ధనుష్‌ను రాజకీయాల్లోకి ఆహ్వానిస్తున్నామన్న విజయ్ పార్టీ టీవీకే

తమిళ సినీ పరిశ్రమలో మరో నటుడి రాజకీయ ప్రవేశంపై ఊహాగానాలు జోరందుకున్నాయి. ప్రముఖ నటుడు ధనుష్ రాజకీయాల్లోకి రాబోతున్నారనే ప్రచారంపై తమిళనాడు ముఖ్యమంత్రి విజయ్ పార్టీ టీవీకే స్పందించింది. ధనుష్ రాజకీయ ప్రవేశాన్ని తాము స్వాగతిస్తామని, తమ నేత విజయ్ రాజకీయ ప్రస్థానం ఇతరులకు స్ఫూర్తిగా నిలవడం సంతోషంగా ఉందని ప్రకటించింది.

ఇటీవల ధనుష్ తన అభిమాన సంఘం పేరును 'ధనుష్ నర్పణి ఇయక్కం' (ధనుష్ సంక్షేమ ఉద్యమం)గా మార్చారు. అనంతరం కోయంబత్తూరులో సుమారు 3,000 మంది ప్రతినిధులతో ఒక సమావేశం నిర్వహించి, ప్రజా సేవ, క్రమశిక్షణపై దృష్టి సారించాలని నిర్ణయించారు. ఈ పరిణామాలతో ధనుష్ కూడా విజయ్ బాటలోనే రాజకీయాల్లోకి వస్తున్నారనే చర్చ మొదలైంది.

ఈ విషయంపై టీవీకే అధికార ప్రతినిధి ఎం. సత్య కుమార్ మాట్లాడుతూ... "ధనుష్ రాజకీయాల్లోకి వస్తే స్వాగతిస్తాం. పార్టీ పెట్టడం ఒక సవాల్ అయితే, దానిని విజయవంతంగా నడిపి గెలవడం మరో పెద్ద సవాల్. దీనికి పూర్తి సమయం కేటాయించాలి. మా నేత విజయ్ తన కెరీర్‌లో శిఖరాగ్ర స్థాయిలో ఉన్నప్పుడే నటనను వదిలి పూర్తిస్థాయి రాజకీయాల కోసం వచ్చారు. ఆ మార్గం అంత సులభం కాదు" అని వ్యాఖ్యానించారు.

కాగా, కోయంబత్తూరులో జరిగిన సమావేశానికి ధనుష్ హాజరుకాలేదు. తన రాజకీయ ప్రవేశంపై ఆయన ఇప్పటివరకు ఎలాంటి అధికారిక ప్రకటనా చేయలేదు. మరోవైపు, ధనుష్ రాజకీయాల్లోకి వస్తే తమ పార్టీలోకి ఆహ్వానిస్తామని అన్నాడీఎంకే కూడా గతంలో ప్రకటించడం గమనార్హం.